تخفى على الحزن ما ودك يبين ؟؟؟؟؟؟؟؟

تخفي علي الحزن ماودك يبين .. وانا اشوفه في نواظرك باين

حزن تدسه تكشفه نظرة العين .. يبين لي من يوم عينك تعاين

عينك صدوقه..لو كذب وجهك الزين .. لو قال حالك زين ماهوب زاين

ومنين جاك الحزن يالفاتن منين .. فضفض وافتح مغلقات الخزاين

قلي وانا خلك على العسر واللين .. فالحب..مابيني وبينك تباين

وانا لك إليا نالك من الزمن شين .. مادمت أمانه .. للأمانات صاين

ان كان صدرك ضاق من طولة البين .. البعد فالانفس مهو فالمداين

حنا ترانا لو بعدنا قريبين .. أقرب من الماطر لخضر الجناين

مادام عشرتنا من سنين ودنين .. حب تشربناه ماهوب هاين

أقرب وفل حجاجك وربك يعين .. والهم ماخلا بهالكون..كاين

قبلك همومي شبت بخافقي لين .. شفت المواجع في فؤادي طباين

ابحرت في الدنيا وذقت الامرين .. هما الرياح تسير عكس السفاين

تجرفني الامواج مدري على وين .. ماهملتني غير والحال شاين

وذكرت حزني منك في نظرة العين .. طالبك..إما اضحك..أو لاتعاين